Mutwarithia wa bodaboda vamwe na andu engi airi aria arakuite nimakuite vauvau vuva wa kuringana kiongo gwa kiongo na matatu mwena wa Research kauntiri ya Kirinyaga, varavarari nene ya Mwea kuthii Embu.

Biacara na umariru niicokereretie waringi tauniri ya Embu vuva wa mithenya iiri ya mirurungano.

Itu ria kieva nirigumirite ituura ria Kathera, Mbeere South vuva wa mucii umwe gucakaya gukua kwa mwanake wao wa miaka 16 Benedict Muthomi, murutwa wa kirathi kia Form 2 uria arivirwe nginyagia agikua ni maavitha a vorithi muthenya wa mirurungano ya Sabasaba tauniri ya Kiritiri.

Vururi wa Kenya ni gatagati ka mavururi 9 maria magukorwa mai ma mbere kwamukira dawa cia kurigiriria kugwatwa ni murimu wa mukingo(HIV) Lenacapavir (LEN) . Kuringana na National AIDS and STI Control Program (NASCOP), dawa ino igakorwa ikionekana vuvuriri mbele ya January, 2026.

Ruvonge ruria ruramataga thogora na wendia ma maguta guku vuvuriri EPRA nimoongererete thogora wa maguta. Thogora wa petrol ukiongererwa na ciringi 8.99, uria wa Diesel ukiongererwa na ciringi 8.67 nayo Kerosene ikiongererwa ciringi 9.65 kwambiriria tariki 15 Julynginyagia 14 Aug

Ruvonge rwa NACADA, ruria ruthurimaga wendia na utumiri wa dawa cia kulevya guku vururiri nimaugite ati nimagukorwa makirigiriria wendia wa njovi kwi andu onthe a nthi ya miaka 21, na wa uguo kurigiriria wendia wa njovi vakuvi na macukuru na makanitha.

CS wa Public Service Geoffrey Kiringa Ruku nìarurìte mùkana kwì aruti wìra onthe a thirikari arìa maì kamenyeri ka gùtìra wìra na gùcererwa gùkinya wìrarì gùkù akiuga mùndù ùrìa akanyìtwa agatwìwa ta mùruti wìra wa ngungo.

Gikundi kia Global Peace Building Network and Clergy nimaambiriritie igomano cia kuvunjia thayu kuonthe vururiri vuva wa kwongerereka kwa mirurungano guku vururiri undu uria ucungiririte andu engi gukua na engi kuthii hathara biacarari ciao.

Ngavana wa County ya Embu Hon. Cecily Mbarire niagite giikaro na anyiti itemi kuuma sektari itiganite kwaria uvoro wa muvango muceru wa kiriu wa Embu Traders’ Information Management System (E-TRIMS) uria utanyitwe kwagiria wandikithia wa biacara kauntiri ya Embu.

Mwanake ùmwe nìùkuìte kìraùko kìa ùmùnthì mwena wa Ìtùndù, Kang'ondu gicigo mbunge kìa Runyenjes vuva kùvùrwa mbaara nì mwìngì ùrìa ùkumwìkùaga na wìi wa mbembe.

Maavitha a vorithi gìtuori kia Molo nìmaambìrìrìtie ùthuthuria vuva wa mwanake wa mìaka 16 gùkuruvanua na gììko gìa kùùraga ng'ina, Beth Wanjiku wa miaka 48 na kùgeria kùthitha mwìrì wake ìrimarì rìrìa aracimbìte kwao nyomba ìtùùrarì rìa Nyakiambi mwena wa Molo.

Eekari a Runyenjes nìmatetete nì kwongerereka kwa ciìko cia wìi wa vikiviki. Lincoln Munyaka ùrìa nì mùvùri biacara taùnirì ya Runyenjes nì ùmwe wa andù arìa vikiviki ciao irìkìtie kwìwa, gùkù akìvoya mwìngì na vorithi kùmùtethereria kunyita eeki naì aya.

CS wa Energy Opiyo Wandayi, PS Alex Wachira, CEO wa REREC na atongoria engi a Embu ta munini wa ngavana wa Embu Kinyua Mugo, Woman Rep Pamela Njoki Njeru, Senator Alexander Munyi Mundigi na ma-MCA engi nimagwatanirite kuruguria muvango wa gutambia thitima ituurari ria Kanginga.

Rais wa vururi wa Uganda HE. Yoweri Museveni niakinyite vururiri wa Kenya, na varia amukiritwe thingirari wa iregi (Statehouse) ni Rais William Ruto, munini wake Hon. Kithure Kindiki, CS wa Foreign Affairs Musalia Mudavadi na Governor wa County ya Nairobi Hon. Johnson Sakaja.

Mutwarithia wa bodaboda kuuma Embu Joseph Thuku uria wicikene ta "Kaka" na uria ni murimiriri wa vakuvi wa mubunge wa Manyatta Hon. Gitonga Mukunji niarekereretue umunthi na bail ya 5,000. Kaka anyitirwe ni maavitha a vorithi tariki 28 mweriri wa July.

Maavitha a vorithi kuuma County ya Kirinyaga nimathuthuria gicanjama kimwe varia mwiri wa mundumurume umwe uria wina njuiri cia Rasta ukorirwe ucuritue kithakari kimwe mwena wa Ndomba, Kutus gicigori mbunge kia Mwea-East.

Eekari a ituura ria Ngomongo kauntiri ya Kirinyaga nimatungitwe ni kimako vuva wa gukora mwiri wa mutumia wa miaka 39 uria aranyititwe kiavinya na kuuragwa utetwe rutereri rwa varavara.

Biacara niirungamite tauniri ya Siakago gicigori mbunge kia Mbeere North vuva wa ikundi igiri guukanirira guku eekari magikuruvania avuri biacara aMeru na ciiko cia wei wa vikiviki guku makivita nimakumengata marega kuvecana andu aria maragera ngero ino.

Mundu umwe niukuite guku wingi umwe agitigwa na ndivangio vuva wa lori ya kambuni ya Kenya Power kuringa nduthi iria iramakuite kavindari karia magutonyagira varavarari ya Gachuriri mwena wa Gachoka gicigori mbunge kia Mbeere South.

Mama nimo maumiririra ma mirurungano iria irathiicaga nambere tauniri ya Siakago gicigori mbunge kia Mbeere North muthenya wa igoro, na varia indo cia makiri ma mbeca iravivirue kavindari karia eekari marang'ethanagira na avuri biacara Ameru aria makuruvanitue na kwia nduthi.