اتخضيت لما أفتكر حدث معين في حياتي وألاقي إن فات عليه أربع ولا خمس سنين مع إني حاسه كان قريب جداً .السنين فعلا بتجري بشكل مرعب.. والعمر بيتسرسب من الواحد من غير ما ياخد باله.. ودي في حد ذاتها حاجة تخوف.. ولكن لما بقعد أفكر شوية.. بحس إن طب ما كده خير برضه مش حاجة بشعة يعني..

لما تحاول تتخطى حاجة جواك مسببالك حزن جامد و تعباك نفسيا دي حاجة مش سهلة خالص ، الحقيقة ان الواحد بيعافر وقت طويل وممكن اوي يلاقي نفسه لسه واقف مكانه زي ما هو والمجهود والمعافرة دي كلها كانت على الفاضي ، فحقيقي ربنا يعين كل واحد بيحاول يتجاوز مرحلة معينة كانت سبب في تدميره نفسيا

ابويا افنى عمره في سبيل تربيتنا وعُمرى ما سمعته في يوم بيشتكي من ضيق حال ولا من ضغط مسؤوليات ايام وشهور وسنين كانت من صحته وعافيته بدون اي تذمر او ملل كانت فرحته بينا وهو شايفنا حواليه عنده اهم انجازاته في الحياه فرحته بنظرة الرضا مننا عن حياتنا هى دى كانت المكافئه ليه فى الحياه

أول ما تتعلق بحاجه وتحبها وتتمسك بيها ، الدنيا هتقولك انت اتعلقت وحبيت ؟ طب إنت بالذات لأ 👌

أجمل حاجة حصلت فى حياتي مؤخراً هي فكرة الاعتماد على الدعاء فى كل شيء ، حتى فى أبسط الأشياء وأكثرها تعقيدًا ، مش رغبة فى تحقيق حاجتي قد ما هو استشعار معية ربنا وعنايته فى كل جوانب حياتي ، الحمد لله الذي وفقني للدعاء وألهمني الصبر وأغنانى عن الناس 🙏

أنا مسامح نفسي على اختياراتي القديمة…مش عشان كانت صح، لكن عشان كنت وقتها إنسان لسه بيتكوّن. كنت بتعلم، بتخبط، وبجرب… ولو رجع بيا الزمن هفضل بنفس العقلية… وكنت هعمل نفس الحاجات اللى عملتها … فالذنب ملوش لازمة … الفهم هو المهم

أتمنى إن اللي جاي من عمري يبقى لسه فيه مساحة للفرح والاطمئنان وإن قلبي يفضل شايف الدنيا بعيون الطيبين مهما حصل وألاقي نفسي لسه عندي القدرة إنى اساعد غيرى واكون امان للناس اللى حواليه وأتمنى أخرج من الدنيا بسيرة طيبه ورصيد فى قلوب الناس يخليهم يفتكرونى وسط الزحمه ودوشة الدنيا

فيه حاجات كتيرة فى حياتك قيمتها الوحيده هى إنك عايزها … لما تبطل تعوزها هتكتشف إن ملهاش أي قيمه

الحياة مفيش فيها شيء مضمون مش كل اللي بتخطط له بيحصل ولا كل اللي تخاف منه بيجى الحياة بتمشي بقوانين إلهية أكبر من حساباتك وكل ما شديت قبضتك عليها تعبتك أكثر خلى عندك سعي لكن بدون صراع وأمل بدون تعلق، وثقة إن اللي مكتوب لك هيوصلك حتى لو انت ما عرفتش توصل لُه