روّحت معظم احلامك حبيسة صدر مثل حرٍ ترده يوم يكفخ حبال مير عشها ولو ماشفتها يابدر مثل عيدٍ تعذّر فيه شوف الهلال

ياتل قلبي من معاليقه ماتلته عليا من ابوزيد قربك قمر لو عيني تويقه لكن على مدة يدي بعيد لو تخبرين البعد ماطيقه خابر جفالك ياعنود الصيد الحلم اجمل قبل تحقيقه شف #ليلة_العيد اجمل من العيد

ياصاحبي لو الزعل واصل اقصاه ماردّنا عن الوفا والمواجيب الوصل فالماجوب ياطيب مسعاه طبيعة كرام اللحى والاشانيب الي سبقنا بالجفا مالحقناه يسدنّا يومن سبقناه بالطيب ولو تعدّاني قبل لاتعداه اهمّ شي انه تعدّاني العيب

استغفر الله لكن خاطري كنه يومه لقى الجادل ويوم ابتعد عنها مدري شعور آدم الي داخل الجنه ولاّ شعور آدم الي خارجن منها!

مثل منهو تبع طيف السراب وحصّل الواحه!

يالطيّب الي مالقى حوله عضيد لا تحسبن مالك بدون الناس فود بقلبك الساطي وبالراس العنيد وبوجهك المحشوم وبيمنى تجود ترفع ذكر ربعك خذ العلم الاكيد سواة مالخيمه يوقفّها عمود والمملكه قامت برجّالً وحيد امامنا عبدالعزيز ابن سعود

ياصاحبي جابك على طيب وعزوم الي يجيب الحرّ من جوف وكره لولا جهاد النفس ماسادت القوم حتى البطل على البطولات مُكره ارهي على نفسٍ عن العالم تشوم وُلاتلزم الا حمد ربك وشكره الي على كل البشر حي قيوم وَلاتطيب الحاجه الا بذكره ومادام يومك ينتهي وانت محشوم الي رزقك اليوم يرزقك بكره

قولي مَـ في قلبك مثل ريم يابوي واقول مافالقلب مثلك يـ ريما اثر اللتل قرل اعظم من اللتل بوي الي رموها فيك ياهروشيما

انا صديق احلام عينك عن الليل وانتي عيوني ياصديقة سهرهم لايم عيونن مالقت للجفا حيل ويوم اذكر انه من جفاك آعذرهم واكثر صلاتي منك على سماعيل آله على الترحال ربي امرهم كن بالحشا من ضمِّتِك زمزم يسيل والشوق صوبك كنه اعداد جُرهم يردّني من رد موسى من النيل صوب الي ينتظرونّي وانتظرهم

ماعاد صرت افقدك لاغبت عني مرخوص مهما رحت عني وعوّدت منك الخطا يازين ماهوب مني عوّدتني على الغياب وتعوّدت

يلي بعد فرحتي ساعة ملاقاته اثر الفراق ايتنوّى ليت مانوّى لقاك يشبه دخول ادم لجنّاته وفرقاك تشبه خروجه عقب ماسوّا لكن يهوّن على قلبي معاناته اني ابلقاك مثله لالقى حوا

سلام عن بدّ العرب يبن مسعود آلاد عبدالله رضى الله عنّه يامحسنين الظن في كل معدود علي نعدّه صدق مانحسبنّه اذا ذكرنا طيب لـ احفاد وجدود هو طيّب وجدّه مبشّر بجنه

جاي للغالين في راسي هواده راسي القاسي تركته للمعادي لو لكل الناس ما اقبل نقاده معطي الغالين راحه فـ انتقادي المحبه ردّت القاصي بلاده وش بلاها غرّبتني في بلادي لو احصّل عن جفا الغالي إراده وش اسوي في غلاه الـ لاارادي ! البلا ماهو لـ صار الطيب عاده البلا منهو يشوف الطيب عادي

لاطاح بك حظك مثل طيحة الليل انهض مثل شمس الصباح الرفيعه مَـ اْشره على جور الزمن والغرابيل مير الزمان اشره على من يطيعه فلت حجاجي ماهي من التساهيل لكن طناخة راس فينا طبيعه النفس سمحه والليالي مشاغيل والناس واجد و ارض ربي وسيعه مواصل الي يستحق المواصيل ومقاطع الي يستحق القطيعة

نتبع صفا الايام ونخلي الغبْر ولو ما نسج من الدهر وش نسوي؟ دنيا تغر بـ وجه وان ولّت الدبر عرفت فيها صاحبي من عدوي اضحك مع الحيّين وابكي على قبر وانا اْدري ان الوقت توّه وتوي من بسمة الحرّه ومن دمعة الكبر ومن طول ياليته ومن كثر لوي وراني البلوى ووريته الصبر والضربة الي ماتموّت تقوي

لبيه ياترفه مثل مجمَع السيل مصبوب فيك الزين من كل وادي للشوق مع عوج الحنايا مواويل مثل الغصون مْجمّعة كلّ شادي لكن رنيم الشاديَه مثل ماقيل "ماله جِدا في ملّتي واعتقادي" الحب صاير يشبه كْتاب الانجيل! صحيح لكن حرفتْه الايادي ماهوب عادي من غيابه غرابيل لكن بعد ماغاب كل شيّ عادي

للغصن كل صبح من ضجة عصافيره الي بصدري معَك من ضجة امالي يالغالي الي رجوعه زاد تقديره كنّه رجوع النهار لْـ قدره العالي لو غيّب الوقت عني غالي السيره ماغيّب الوقت عني سيرة الغالي