الشرق الاوسخ

ف العادة اي شعب عنده نمط معين عايش بيه تقدر تفهمهم منه ، ما اديرلهمش كذا ، يحبوا كذا .. إلا شعبنا العشوائي هذا يدوخك ماتعرفش شن يبي ، شن يحب شن يكره شن يفكر ، مافش نظريات اطبقهن عليه مافش حدود مافش شي ، بصاير يدقن كل يوم برأي لعند نفنو كلنا ..

#جداريات

لا لتهجير سكان غزة ، نعم لتهجير الليبين ..

عندنا اختلاف الرأي يخرب ف الود ويفسد ف القضية ..

شعرة بين البصارة وقلة القدر ، ركزلها وخفف ماتقعدش فريو ..

مش عام تفاصيل وكثرة دي ، هات الزبدة واطلع بالخلاصة ورسيني ع المضمون ..

كنها حياة فلينستون من شنو تشكي ، لازم اتصعبوها يعني ..

الحمدلله ع الصحة والعافية ، الحمدلله ع الأهل والأصحاب ، الحمدلله علي كل نعمة من رب العالمين ، الحمدلله في كل وقت وكل حال ..

بكل اختصار"الشعب الذي يقف في طوابير لتحية الفاسدين و يمنح السارقين ألقاب الرفعة و السمو مثل "الحاج و معاليك" هو شريك و ليس ضحية و هو سبب معناته.

سراقنا سارق أقل من سراقكم ، يا سراقين ..

كاينة لا أرى لا أسمع لا أتكلم ، توا يحق ويسمع ويقود ياريته يتكلم ..

قالك يلموا في تبرعات لغزة 😂 ، تي غير فكه من ذيلك بس ..

العقد الكروية كلهن انحلن ، امتى اتشد الهايكة اللي طولت ..

حتى كان في لقمة العيش شراقة .. رباوة عصر ماهن رباة لقاقة .. ماهن رباة اتلكي .. ولا نزلن تمن زمزكة وتشكي .. ولا عمرهن تكن مع المتكي .. ولسع عصرهن يوم طاح ارواقه .. غناية بعزة نفس عاشن هكي .. ان ضاق حالهن ماهن اللي شفاقة . كمين كرب داهمهن عنيف يبكي .. تلقن اقدومه ضاحكات رواقه ..

الحمدلله طلعنا من عنق الزجاجة ، وقعمزنا عليها ..

قود واستفيد باهي ، بيش انقولو قود وطار ..

العالم يفكر برا الصندوق ويحاولوا يعالجوا ويطوروا ويديروا راي للمواطن في حياة كريمة ع الأقل ف الأساسيات ، ونحنا جبنا الصندوق ترينا فيه ..