In ne postuutsöökhalle in et süüddüütske Langenzenn by Neurenberg sint minstens twaalv lüde slecht to passe wörden döär poder uut en verdacht pakket.

Et leager van Myanmar hevt sesteen lüde anhölden. See solden wat to maken had hebben med den moard up nen old-generaal en diplomaat verleaden månd. De lüde sint "terroristen", meynt et leager. En meyken van 6-jår inbegreapen.

Lokale polity hevt ne vöärname kokainesmokkelgrupe van 48 lüde uperuld. Dee vervoorden et snuuvgood med speedboats vanuut Brasilie en Kolombia nå Fuerteventura, Gran Kanaria en Lansarote.

Minsrens dree lüde sint ümmekümmen by ne grouten russiske besketing up et ukrainske Charkiv. Den börgemeister van de eyn-nå grötste stad van Ukraine sea, et was den swöärsten anval seyd den anvang van den oorlog.

DOGE, de amerikaanske warkgrupe wat oaverheidsuutgaven dår müt torüggesnoien, mag van et houggerechtshov rundkyken in et systeem by de federale uutkeyringsdeenst SSA. Dee hebbet persoonsdata van miljonen amerikanen.

Et taiske leager beheyrt de grenspöste med Kambodja. Volgens Tailand gaddert Kambodja voordan meyr soldåten an de grense, düs doot see dat ouk. De landen hebbet al längeren tyd verskel oaver en stükke land. Verleaden månd küm der al nen kambodjaansken soldåt by ümme.

Peruaanske polity löt nen drugsvangst van 5,5 tonne kokaine en marihuana seen. Den vangst is deyl van ne gröttere operaty, wårby al 13 tonne underskepped is. Et was vöäral bestemd vöär Europa en Noordamerika.

Nen kolombiaansken presidentskandidåt, Miguel Uribe Turbay (39) is dreemål besköäten, wårvan tweymål in et höyvd. Hee was up stemmersveldtocht in höyvdstad Bogota. Hee hölde nen tospraak in en park. Eyne van 15 jår is anhölden, segget lokale media.

Den amerikaansken president Trump wil de Nationale Garde löslåten up demonstranten in Los Angeles. Dee gåt et al twey dage an teagen Trump syn strakke immigrantenbeleid. De strydmacht insetten wil Governöör Newsom van Kalifornie noch nich an.

Den old-vöärsitter van et liberiaanske parlement is anklaagd vöär et anbütten van et Huus van Afvaerdigden, löt polity weaten. Den brand bröäk uut nen dag nå at Jonathan Fonati Koffa wipped wör as vöärsitter en protesten uutbröäken in höyvdstad Monrovia.

Kyrgysie hevt en grout standbeald daletrökken van revolutionäär sovjetleider Lenin - möägelik et grötste in Middenasie. Et 23 m groute denkmål keak 50 jår lange uut oaver stad Osj, de tweyde stad van et land. Et wör tosat do as Kyrgysie noch by de Sovjetunion by an höyrden.

In Düütskland slutet sik voordan meyr gevöärlike lüde an by ekstreme partyen, vöäral up rechts. De meysten gåt by Alternative für Deutschland. Dat skrivt de binnenlandske seakerheidsdeenst BfV in en jårverslag.

Minstens 10 lüde sint ümmekümmen döär nen skoolskütter in et oustenrykske Graz. Dårunder sint leyrlingen, nen vulwaskenen en den skütter selv, seade börgemeister Elke Kahr teagen et oustenrykske APA-nys.

Israels leager hevt vannacht luchtanvallen dån up Yemens havenstad Hodeidah. Houthirebellen solden dår wåpens döärvoren, meynt Israel.

Hunderden tunesiske en algerynske aktivisten sint seyd måndag underweagens med hülpgood vöär Gaza. Se willet by Rafa in Egypte döär Israels blokkade hen.

Brasilies ekstreemrechtsen oldpresident Jair Bolsonaro seade vöär et houggerechtshov at he niks to maken had med plannen vöär nen möägeliken ståtsgreyp in 2022. Dee solden de nye regeyring van den linksen president Lula da Silva ümsmyten en emselv weader an de macht brengen.

Hunderde maskede upstandigen hebbet in et noordyrske Ballymena polity anvöllen en hüse en wagens in brand stöäken. Polity meynt, de relsküppers hebbet en 'racistisk motiv', weagens nen vermeynden seksuälen anval van en migrant up en meyken uut de stad.

De VS wil öäre embassade deyls löädig hebben weagens sorgen oaver de veiligheid in dee streake. As se dat willet, magget andere beambten in et Middenousten ouk weaderümme, sou as uut Bahrain, Kuwait en de Vereanigde Arabiske Emiraten.

By russiske droneanvallen up Charkiv in noordoust Ukraine sint 3 lüde ümmekümmen en 60 gewund eraked, segget beambten. Twey woanwyken van de stad, dee mär 30 kilometer van de grense ligt, kreag 17 drones üm de ouren, volgens börgemeister Ihor Terechov.

Nen stråljager van et myanmaarske leager is dinkseldag dalekümmen in de streake Sagaing, wår vöäle rebellen sittet. Et leager segt, et sol döär nen kapotten motor kummen. Rebellet meynet, see hebbet et dalesköäten.