أني أدري هذه مشكلة تافهة جدًا، بس التلوث البصري همين شي بائس. الواحد يطلع السطح يباوع ما يشوف ولا نجمة؟ السما لونها رمادي كلها تراب عبالك مدينة بنص الصحراء. هيچ شي ما چان موجود قبل عشرين سنة.

أتمنى الله يرزقني لا أبالية الناس إلي تروح عيادات كلساع وتراجع أطباء بين فترة وفترة، وماخذين الموضوع كأنوا رايحين لصالون أو دا يكملون معاملة، شگد گلبهم گوي. قلبي ينقبض من أشوف لوحة لأي طبيب.

ترى لو تحسبها.. نص الفشل إلي يصيب الواحد هو نتيجة قرارات غلط إحنا اتخذناها عن وعي كامل لأن عبالنا هذا أفضل قرار متاح، النص الثاني هو سوء توفيق أو ظروف طارئة أو أذية من الآخرين أو يمكن عمة جد خال جيرانك شافتك صدفة وحسدتك.

هذولا إلي يگولون الصيف هذه السنة شوية أهون دا يقشمرون نفسهم والله. العراق من منتصف شهر الخامس إلى منتصف شهر العاشر ما ينعاش بيه. اشتغل وجمع فلوس وروح شوفلك مكان تعيش بيه خلال هذه الفترة.

ينراد يخترعون حايط مطاطي أو بيه طبقة حماية حتى ترگع راسك بيه براحتك، بدون ما يصير بيك ارتجاج.

منتظرين القنوات العراقية تدور على الطالب المثالي إلي ما عنده ملازم ولا ياخذ خصوصي ويمكن حتى كتب الدراسة ما عنده وأصلاً يشتغل ثلاث شغلات باليوم وحدة منهم يكسر حجار والثانية ينفخ بالقير والثالثة يزرع الصحراء وبيته حفرة. بس مع هذا فات وزاري وطلع معدل 107 بدون إضافات ولا مواد حافظة.

تگدر تعرف أنت شگد مضوج الطرف الثاني، لما هو يخصص من وقته حتى يبحث بمنشوراتك القديمة، بلكت يشوف شي ينلزم عليك، حتى يحس بانتصار زائف.

أحيانًا الواحد ما يعترف بغلطه مو لأن هو عنودي أو نرجسي، ولكن لأن الطرف الثاني ما يستحق هذا الاعتراف، والكرامة حلوة.

سؤال صغير.. هو ليش لازم درجة الحرارة تصير 51 يلا ينطوها عطلة؟ يعني هيچ أكو فرق بين 50 و 51؟ ترى الجو كله لا يُحتمل هذا الأسبوع. طبعًا هذا الكلام ما يشمل موظفي القطاع الخاص إلي لو درجة الحرارة تصير 80 همين لازم يداومون.

أحترم إلي يظلّم الدنيا ويسدها بوجهي بس يحچيلي الصراحة، أكثر من إلي يتفائل زايد وينطيني وعود فارغة، ويعوفني على المغذي.

يعني لما الواحد يختفي وما يسأل فأنت تعاتبه أو حتى تحچي وياه بأسلوب مو حلو بعدين يشرح لك ظروفه، فهنا أنت تعتذر له وتتفهم إلي صار وياه. لكن لما تحچي بأسلوب مو حلو وية شخص عزيز عليك وأنت تعرف ظروفه وشگد هو دا يتعب ويمكن يتعب على مودك، فهنا أنت من صدگ ما تستحي.

شايف أنت من تشوف صديقك أو أحد أفراد عائلتك دا يشيل شي ثگيل فأنت تبادر تساعده. بس لما صديق عزيز عندك تعتبره فرد من أفراد عائلتك، شايل هموم ومشاكل على ظهره.. هنا تتمنى لو تسوي شي بحيث تگدر تشيل وياه هذا الثگل.

كلما أشوف هذه الصورة، أتذكر جيران أقاربنا إلي كل يوم عركات ومشاكل وصياح وزعلة يم الأهل، وإذ فجأة نكتشف إنو عدهم حساب بيه نص مليون متابع، وكل فيديوهاتهم تمثيل عن السعادة الزوجية والعائلة السعيدة، بحيث إذا تشوفهم تتمنى تصير مثلهم!؟

الناس تحب أجواء المؤامرات والتحالفات الماسونية، لأن دائمًا تحس بروحها متقشمرة، ولازم أكو واحد ناصب عليهم. همين تحب سوالف الظواهر الخارقة ونهاية العالم، لأن عاجزة عن مواجهة مشاكلها وعن إصلاح بُنيَّتها، فتحيل الجَمل بما حمل للقوى الخارقة إلي راح تدمر الخراب وتنقذ الصالح من الطالح.

إلي علاقته زينة وياك، وراها يقطع تواصله وياك نهائيًا، وبدون سبب مقنع، هذا نعتبره مخبل. نقطة راس سطر.

غباء الانسان ينكشف لما يتناقش بمجال مو مجاله. لأن المفروض هو مو مجاله وما عنده خلفية عن الموضوع، ليش يتناقش بيه؟

أصحاب النوايا الخيّرة إلي يرتكبون جرائم، يصيرون أسوأ وأقذر من أصحاب النوايا الشريرة لما يسووها.

يابة للمستقبل بما انو احنا عايشين بزريبة اني ما انتحر ما انتحر ما انتحر ومستحيل انتحر لو شو شنو يصير كلنا عدنا ضغوطات عمل اني داخلة طبية وهي متعبة بس مو معناها انتحرررررر حياتنا كلها سترس بس ما انتحررررررررر صارلي ٢٤ سنة بالعراق وما انتحرت ما انتحر هسة او بعدين تأقلمت على النعل

أفضل حل لقضية المغدورة بان زياد إنو تتشكل لجنة من خبراء مختصين بيها أجانب وعرب وعراقيين وتسوي تحليل كامل لجثمانها، وبالنهاية تطلع بنتيجة كاملة عن الموضوع. هذا أفضل من تقديم تحليل بناءًا على صور غير واضحة، وخصوصا أكو تزوير وتلاعب فاضح دا يصير بالموضوع.

هذه السنة لو تلاحظون ماكو النغمة الدورية مال مقاطعة الانتخابات، لأن يمكن كل إلي عنده توجه سياسي قرر المشاركة بهذه المرة، حتى إلي كانوا يهوسون بسالفة المقاطعة.