العاشق اللي متعبه كثر توقه للغايب اللي منه دايم يعاني يمديه يسلم من جروحه وشوقه إليا كفاه الله شر "الأغاني" ثامر

جاتني وأنا حزين و ممتلي بالخيبة لي سنينٍ بيني وبين السعادة حاجب قالت اعذرني على قلّ الوصل والغيبه قلت "طيفك" ما يقصّر قايمٍ بالواجب ⁃ثامر

الجاهل اللي يدّعي بالدّرايه لاغاضني تفكيره احاول اكضُم ولختلف معه ليبدا برايه اقول له "صادق" علشان "يبضُم" ثامر

نعطي ولا ناخذ وحنا طفارى ولا نشتكي مثل الضعوف المساكين شمنا عن الطلبه وصرنا "فقارى" لو لا شيمنا كان صرنا "غنيّين" ثامر

"عاتبته"وقفّى وطوّل غيابه ياليت ينسى ما حصل "ناعس الطرف" ان كان ربي بعْد غيبته جابه والله ما عاد اقول ميده ولاحرف ثامر

لا تخاف منّي لا تركتك وصدّيت بموت وسرّك ما تحلّل وثاقه رغم العداوة يا حبيبي تساميت عن الأمور الهيّنة و الحماقه انا ليا انهيت العلاقة وقفّيت اقطع لساني لا قطعت العلاقة ⁃ثامر

يا بو سعد قد كنت هاقي في دنياي لين ألتفت اليوم ولا وجدتك راحت بي الدنيا على غير مشهاي تبي الحقيقه والله إني "فقدتك" ثامر 1 ديسمبر 2021 م 5:23م

ما عاد افكّر في خساره ولا ربح يا "صبح" ماني طامعٍ في رباحك مادامني يومياً اشوفه الصبح سعيد لو ما قال "يسعد صباحك" ثامر

اليوم كلٍ منشغل بالمكالم كلٍ بـ "عيد الحب" عيّن نصيبه الظاهر اني اليوم والله عالم اني الوحيد اللي ماعنده "حبيبه" ⁃ثامر

تفكيرك اثبت لي سخافة خيالك طوّل معك وقتي وطوّل وقوفي ياللي كتبت الشعر من حرّ مالك انا كتبت الشعر من حرّ جوفي ثامر

قريحتي من فترة وهي تعاني ولعلّ ذايقتك تحفّز رجوعي مابي القصيد اللي يحرّك لساني ابي القصيد اللي يحرّك دموعي

آخرر دمعتين .

وحاضرك لو عشته سعادة ترى احيان يقتلك لامنّه تحوّل لماضي

مهما حصل طالبك لا تصير قاطع اتصدّق اني في غيابك تروّعت الحزن في وجهي لها ايام ناطع باين على وجهي الحزن لو تصنّعْت من امس اقلّب في الصور والمقاطع لاشفت صوره فيها انا وانت دمّعْت ثامر