تدرون انه باقي 8 ايام على بدايه المعسكر وللحين الهلال بدون: - مهاجم - صفقه المحور - جناح ايمن وبدون حتى مدير رياضي .. وبدون تعزيز الدكه ب لاعبين محليين .. ليه كذا الوضع مجهول ومحد يعرف نتايجه ؟! الى متى هذا البرود رغم الكل يعرف احتياجات الفريق ومن شهور صحصح فهد بن سعد بن نافل

أنا مشجع هلالي وعندي حلم بسيط وبكون راضي تماماً : ودي بسسسسس اشوف هاللاعبين بفريقي صدقني هذول هم مهر الدوري ومهر النخبة بعد فهد بن سعد بن نافل

الحين في مباراه تُلعب بالدوري البرازيلي .. الثعبان كاريو ضد السوبر ادواردو حاولت اكون محايد وأشجع الاثنين لان كلهم لهم ذكريات عظيمه معنا ومن افضل الاجانب بتاريخ الهلال لكن يخوان والله ماقدرت اصير محايد بوجود كاريو 🥲 رجل السابعه وعرابها له محبه خاصه عن كل اللاعبين 💙

اوسيمين طار وراح تركيا ايزاك يبي ليفربول فقط وبنفس الوقت طلعت اخبار ان إنزاغي مايبي ميتروفيتش لانه ما يناسب أسلوب لعبه ويبي مهاجم حركي وسريع. يخوان يخرب بيت الوهقه.. من يكون مهاجمنا ؟! ماعاد باقي الحين إلا نونيز ولا نكمل على ليوناردو ! والله هذه الوهقه صدق !!

والله عندي موضوع مُحير وقلت بسالكم .. الحين ليه الهلال بالذات كل موسم وكل فتره لازم نعاني من ناحيه التعاقدات ومن ناحيه التأخير إذا المال ؟! متوفر واذا سمعه النادي ؟! هو كبير القاره والأكثر نجاحاً فيها كل هالمغريات مع ذلك نعاني والانديه الأخرى يتعاقدون ويخلصون قبلنا وش السبب !!

انتم نايمين وانا مواصل وشايل هم من يكون مهاجمنا ميتروفيتش ؟! إنزاغي رافض بقائه ليوناردو ؟! صغير وماتقدر تعتمد عليه طيب لو قلنا نتعاقد مع مهاجم جديد ؟! ايزاك المهاجم السوبر الوحيد لكن صعب جداً طيب الخيار البديل نونيز ؟! ياخي الانهاء عنده كارثي والله هواجيس وتخليك تشيل هم غصب :(

ايزاك طلب الرحيل من نيوكاسل وبنفس الوقت ليفربول تعاقد مع المهاجم اكتيكي بما ان ايزاك يبي يطلع وبنفس الوقت ليفربول جاب مهاجم وطبيعي ماراح يدخل بقوه ويصرف مبلغ كبير ياخي هذا وقتكم .. عطوا نيوكاسل عرض مغري وكبير وراح يجيبونه بنفسهم للعريجاء. افعلها يا ريّيس فهد بن سعد بن نافل 👍🏻

والله اني أنقهر على اللاعب اللي عنده امكانيات لكن بنفس الوقت عقليته هي اللي قاعده تخربه .. مثل اللي قاعد يصير مع مصعب الجوير .. شارط انه يبي يلعب اساسي ولا يرحل وهو حتى ما فكر ينضم للمعسكر ويقنع إنزاغي بامكانياته وياخذ ثقته والله خايف ان هالعقليه تخليه ينتهي بشكل مبكر !

والله اني اقدر واحترم كل السنوات اللي قضاها واللي ينسى الفتره اللي عمل فيها هذا شخص جاحد .. لكن الان الطموح صار أعلى وكل الإدارات صارت تعتمد على اشخاص فاهمين بالمجال وذو شهادات عاليه مع ذلك شكراً على كل السنوات الجميله يا فهد المفرج والله يوفق هلالنا بالقادم 👏🏻💙💙💙💙

خبر على الماشي : 90٪ مهاجم الهلال القادم هو داروين نونيز. أنا للامانه كنت ضد صفقه نونيز بسبب مستواه الاخير لكن الشيء الوحيد اللي ممكن يخليني اتفائل فيه ؟! هو ان إنزاغي موافق عليه وذكر انه يناسب أسلوب لعبه. ودام إنزاغي يبيه هذا بحد ذاته يخليك تتفائل فيه 💙

على طاري جواو فليكس .. تدرون ان الشايب جيسوس وقت تدريبه للهلال طلبه بالاسم اكثر من مره لكن الاداره كانت ترفض .. وحتى الجمهور وقتها اطلقوا هاشتاقات يرفضون قدومه لأن فليكس بكل محطاته الاخيره فشل فيها فشل ذريع والحين الشايب السمسار الكبير جابه ودبسه للنصر 😅

الجمهور الوحيد اللي يعرف مصلحه فريقه وقادر يوقف اي صفقه كانت هو جمهور الهلال .. لذلك الامل فيكم كبير .. مثل ما وقفتوا صفقه فليكس ووقفتوا صفقه انخلينيو والقائمه تطول وتطول .. الان من مصلحه الفريق لازم نوقف صفقه نونيز الكل يشارك بالهاشتاق يا صناع القرار 👏🏻💙💙💙 #نونيز_مرفوض2

صفقه المهاجم هي اهم صفقه للفريق بهذا الصيف .. لذلك ماراح نرضى بمهاجم عادي او مهاجم اقل من الطموح ومن اجل مصلحه الفريق .. يلا بسم الله نبدا الهاشتاق ابي 500 منشن بالتاق هنا .. نبيه يوصل ترند 🔥🔥💙 #نونيز_مرفوض2

هلالي وتهمك مصلحه فريقك ؟! تبيه يكون بالقمه دايم ؟! تبي تشوف فريقك يكون قوي ومرعب ؟! تبي تشوف فريقك يكوش على كل البطولات ؟! صفقه المهاجم اهم صفقه وهي اللي تحدد مستقبل الفريق لذلك ياخي اترك التخاذل وتعال شارك معنا بمطالبنا إذا تهمك مصلحه فريقك .. الكل يشارك 👇🏻🔥 #نونيز_مرفوض2

اللي مؤيد صفقه نونيز ؟! تعال معي واقنعك تجي تقولي ياخي مهاجم سريع ومكينه ضغط ؟! أنا وش استفيد بكل هذا إذا كل المهاجم سيء بالإنهاء تجي تقولي مستواه مع بنفيكا كان ممتاز ؟! أنا وش ابي بالماضي .. أنا على اللي اشوفه الحين والكل شايف مستواه مع ليفربول كيف كارثي لذلك #نونيز_مرفوض2 👍🏻

صحيح اننا نبي مهاجم .. بسس مو لازم نتعاقد مع اي مهاجم حتى لو كان عاهه بسس اهم شيء نتعاقد ! والله ان بقاء ميتروفيتش أهون بكثير من اني أشوف مهاجم كارثي مثل نونيز وب 70 مليون بفريقي !! لو مره انحديت ياخي اشتغل على ميترو وجهزه بالمعسكر وصدقني انه افضل من نونيز بمراحل. #نونيز_مرفوض2

في شيء قاهرني وللأسف هالكارثه محد منتبه لها لو تسال وش كان سبب تفوق الهلال السنوات الاخيره ؟! الكل وبدون تفكير بيقولون تميزه بالعنصر المحلي الان استغنى عن: العويس الشهراني الجوير وللأسف قاعد يفرغ الدكة والباقيين اقل من الهلال مثل القحطاني والحمدان وغيرهم الله يستر من الجاي !

بعد خروج بن نافل قاعد اشوف اراء كثيره بخصوصه .. ناس حزينه على خروجه وتشوفه افضل رئيس مر على تاريخ الهلال وحقق انجازات كبيره .. وناس سعيده برحيله لانه ضعيف من ناحيه الصفقات وتشوفه خلاص اعطى كل اللي عنده. وش رايك في رحيل بن نافل يا عزيزي الهلالي ؟! 🤔

والله ماهمني من يكون رئيس الهلال القادم ولا مهتم لهذا الموضوع اللي يهمني هو إستمرار دعم العضو الذهبي وكبير الهلاليين الأمير الوليد بن طلال .. اللي دعم الفريق ب مليار ونص بيخلي اي رئيس ينجح مهما كان اسمه والله محظوظين بالرمز .. واللي ماعنده كبير يروح يشتري له كبير 💙💙💙💙

طيب بعد رحيل الاداره ورحل معها المفاوض الضعيف .. ما أخفيكم رجع لي التفائل من جديد من ناحيه الصفقات وعندي موضوع مهم ومستحي اطالب فيه : ايزاك للحين متاح ولا اتفق مع ليفربول ولا غيره ايدرسون موافق يجيك بسس ينتظر العرض منك والله الحين صار هذا اهم موضوع واتمنى يتمممم 👍🏻