وانا على الدنيا من الهيه للهيه ماهمني شهره ولا جمع ثروه همّي وغمّي واحدٍ يوم الاقيه كنّي عليل وشوفته محو قروه -

رسمها القصيد و خصرها يلوي الرسام لاجيت رقبتها وقّف الوصف وأرهقته هنوفً شعرها داعب الريح والأنسام يغار الشجر لاشمّت الورد ونشقته ترا من ستر ربي علينا عليه لثام عسى الله يعين اللي معه قلب وسرقته عطاها الله الأخلاق والذوق والهندام و شايب يحرق المال بالقدر ومرقته -

لين تاصل غاية مُناك يا أغلا من نحب إن سلى قلبك من الحب ولا ما سلى شوفتك عندي بساتين واطلال وسّحب ووحشتك يوم أبتعد عنك يا دافع البلا .

نفرت من الجفا ومن الوداع المرّ والتلويح وجزت من السنين اللي ماهي وياك محسوبه أنا ماقلت أحبك بالعلن لكن بالتلميح بتقراها بطيّات القصايد فيك مكتوبه وتلقاني معك رغمًا عن الآلام والتجريح يروح العمر مالي عنك لا صده ولا توبه

عشقته مثل ما يعشق الأخ ضحك اخيه وقبلته مثل ما يقبل الطب مرضاني حفظته مثل حفظ السنافي وصات ابيه ولفته مثل ولف المولع لشيهاني

نفسي عزيزه ما رضت بالمعاذير ولانيب معودها على الذل مرّه امشي عزيز ما حسبت المخاسير واثمّن المشروه لو ما اتشرّه ما تنثني ساقي بدرب المعاسير و لاينحني راسي ولايموت حرّه على النقا ما ننحدر بالمحادير نظراتنا صوب النجم والمجرّه

يالله وأنا عبدك اللي طامعٍ في رضاك وأحيان أضيّع دروب الحق وأدلها لا جيتك بـ دعوةً فيها شعور إرتباك أفتح لها أبوابك اللي في السماء كلها -

إسرحي يانفسي برحلتك واستمتعي مابي افكر بحاجه قبل توقيتها واشبعي يانفس من عزة النفس إشبعي لو ماني قدّ الصعوبات ماسويتها -

هب الحنين وماضي العمر مركون في زاوية وقت طوينا خيامه ماهي بـ لحية قولو اللي تقولون لا غطرفت فوق الغصون الحمامه ليت الرياجيل الكفو مايحبون خوف عليهم من دروب الملامه بغيت آعلمكم ولكن تدرون آنا ماني بـ آحب مع السلامه -

مِذهب العقل بالرقة وعذب اللسان تقدر على شي .. ما يقدر عليه الخمر صدقّني إن سحرك الدافع لسحر البيان ما للخدود الحمر غير الورود الحمر لو ما يطلّ القمر نفس الزمن والمكان من أبسط حقوقه انه ما يطلّ القمر حسب مواعيدنا المتعارفة من زمان حتى لو تكون آحر بواجد من الجمر -

طلبتك تعذر غيابي إذا جيتك بلاش عتاب أنا طبعي غريب شوي وأعاني من عنادي ٓ ولا تستغرب أني أنقطع عنك بدون أسباب أمّل أحيان من نفسي وهي نفسي ترى عادي .

"أهجر الساري و يوحشني قديم عتابه الغياب أسهل علي و أنا ما أعرف أجادل وين أروح بعيد يا فجرٍ خذا جلبابه من زمانٍ مِسدل من أسود عتيمه سادل ما يقصّر عمر الإنسان أكثر من أحبابه و التشبّث و الشعور اللي ما هو متبادل"

وانا يوم اضيق وضيقتي تبح للاصحاب احب الخفا لـ السر للناس ما ابدي به فقدت الرفيق اللي عليه الضمير انصاب رفيق اللزوم اللي بعيده محاظيبه

سولفي مثل المشاريه في صوت الحشيم وإسكتي مثل الشفايف ليا طاح القناع وإضحكي مثل النواوير في روضة خريم وإغرقي مثل المزاجات في غرب الرفاع وإبعدي مثل المتاهات في حلم اليتيم وإقربي بين السوالف وكتفي والذراع . -

على اللّي تعبت أنسى غلاه وتعبت أسير على جرّته من يوم قفّت مظاهيره حداني على شيئين يالموت يالتهجير بعد كنت في بيت الغلا أغلى مساييره . -

نطوي مع الأيام عامٍ ورى عام وتمرّ ساعات الفرح في دقايق أيام راحت بالعُمر مثل الأحلام يومٍ بها زعلان وأيام رايق درست من دنياي وأتعبت الأقدام وبدّلت عن بعض الطرايق طرايق .

سلامي على الليّ كل ماحن قلبي جاه ويشوف الجهات الأربعه صوبه متاحه لقيت إبتساماتي رهن ضحكة محيّاه ويضيع الكلام ويعجز لساني إفصاحه يصبّ السوالف صبة الكيف من يمناه على مسمع ٍ خرمان حتى تنحناحه .

أنت يا حلو الملامح ويا حلو الصفات جلّ شان اللّي من الزين معطيك رهوه يا محاصرني بذكرك من الأربع جهات ما تركت لساحة البال سجه و لهوه أرتبط وجهك مع الورد و الماء والنبات وأرتبط طاريك مع كلّ فنجال قهوه .

فديتك يوم تاخذني على كيفك ولا أدري وين معك من وين ماذعذع هواك ومالت الفيّه غدينا كنك الشاعر وأنا واحد من الغاوين نهيم بكل وادي من العليّـا للعزيزيّه ، -

السحاب اللّي جحدني يوم أجي له ظامي لا يجيني لا أرتويت و دمعته مصبوبه والشروق اللّي تمنّيته يزيل عتامي ما قدرت أشرق معاه ولالحقت غروبه الفضا الّلي ما يعاتب بالغياب أنسامي ليه ألومه يوم غابت عن فضاي هبوبه والله أن الدمع ما جرب يضمّ أكمامي كيف أصافح بسمةٍ من خاطري مسلوبه .