تخير وخاو من الرياجيل نادر نوع يعز الرفيق من المناقيد و يحنه ولا خوة اللي كنه التاير المرقوع يمشيك لكن منت متطمنً منه

معك للعمر زيِنه و للبال سجّة بال وفيك التقى الحاظر بشيٍ من الماضي تعايشت مع الايام دونك جفا و وصال و رحت الحليم اللي عن الكل متغاضي و جيتك بعمرٍ ما بقى له كثر ما زال فدى حبك العذْب و فدى وجهك الراضي.

الهوى ماينعذل قلب المهاوي دونه والقنوع ان ذاق لذّات الحياه أدمنها نحّروني درب داره لين اشوف عيونه الفجوج وساع ! بس عيونه أوسع منها

سلهام رمشك ماوراه الا العنا ها وين عاد اصد واغض النظر لاعاد تغويني .. بنظراتك وانا مطفوق بعض احيان وقليبي خضر :)

فوق حبّك و الغرام اللي سباني كلي ميّزك ربي بـ عينك و الشفـاه الذبله ِ كيف تلحقك الشكوك وتحزنك وأنت اللي كل يوم يمر و أنت أغلى من اللي قبله

ماغيرتك السنين اللي توالت عليك يـ ناحل الخصر هو ذا صدق ولانحت . لاتزعل ان زاد عمرك كم سنه ماعليك مازالو الغيد لين اليوم منك وتحت🤍

من دونك العمر واحد موت ولا حياه وجيتك ولو كان موتي في مجيّك دريك وطويت دونك مسافات العدا لـ النجاه ماهوب خوفٍ على روحي لا والله عليك . .

تمخطرت في صدرٍ تنفس غلاك سنين وتنحيت عن عينٍ على شوفتك شفقه َ انا اللي حفظتك مثل مايحفظ الوافين عهود الصداقه و الملازيم والرفقه .

يامن لك العبد لو يقضي العمر سَاجد مَ أوفاك حق الشكر والفضل والمنه ٰ ابسّط عطاياك تفرج همه الواجد وأعظم عطاياك تدخل عبدك الجنه

فيك .. من نجم الثريا ونجم الفرقدين وفيك من نور اول الصبح لامنه انتشر لو .. يناظر فيك عالم فلك خبرة سنين اعلن ..ان الارض فيها بدر خمسة عشر

انت شوفة وجهك المملوح تصنع يومي وكل حاجه غير شوفه فـ المساء اكذوبه َ استمد بشوفتك فرحه تبيد همومي ومن ملامحك القصايد تستمدّ عذوبه .

هذا حال قلبٍ يالغلا بالوصل يرجيك وثار الحزن فالروح والكبد مشتبّه وحقك على قلبي ليا من مر له طاريك تلج الضلوع العوج من قـوة اللبّه حقي على قلبك ليا قلت له شاريك فلا عاد يقطع دون ذنبٍ ولا سبه عليك الله أكبر كان قلبي تولع فيك بعد ذاب في حُبك ولا ذبت في حُبه .

صدوف الليالي مدرسه والحياه ظروف ولا فيه شي أحلا ،، من الطيب في حله ٰ لا تندم على المعروف ياراعي المعروف ليا ضاع عند الناس ماضاع عند الله . 🌹

الظروف .. تبوخ و الوقت يتبوكر والردي لا طالت الشطه تسندر لا تقول .. فلان فـ الشدات جوكر كل نادر .. فيه اطيب منه واندر مرة بتطيح .. في فل استروكر ومرة .. بتطيح في واحد سلندر :)

اطيب من الكلمة اللي مالها داعي الصده . . اللي تبيّض وجه راعيها

مثل ماتفضح حزن وجه الحزين البكيّه المواقف تفضح اللي بالنفاق يجاهر ' لا يغرك مظهر الرجال والا حكيّه والله انه ما لعب فالناس غير الظاهر !

الجوارح طاغية بسّ القلوب مصدّه والوصل عقب انقطاع احيان ما له داعي حبلك المتواكل اللي تقصره وتمدّه عايفه حتى ولو تلويه فوق ذراعي

قد بلغنا في الهوا العذري حدود الذروة لين صار اصدق كلام العشق ما يوفينا بالنظر نشرح مشاعرنا ونرد الحروة عن كثير هروجنا نظراتنا تكفينا

اثر الرياجيل ... تفرق بالمدى والعزوم والطيب كايد وحزات المواقف محك احدً على أتفه سبب ما عاد يقدر يقوم واحدً لو تسكر الدنيا بوجه ضحك

تجـود المزون الغُر من متنها المزحوم وتجود النفوس الطيبه حسب معدنها. نطيب ونعرف إن الجمايل بتبقى دوم لو إن اللـيالـي السـود مااحدً بيامنها ؛)