تعبنا ..

يارب ليلة تمر ما تضر احفظنا يارب وسلمنا الاصوات مرعبة 😭😭😭

يارب بدّل خوفنا أمناً وسكينة يارب بدنا ننام😭🥲

تعبنا يا الله .. كانه الحرب رجعت من اول وجديد يارب سلّم يارب احفظلي ابني وزوجي واهلي وبيتي 😭😭😭😭😭

المجاعة في شمال غزة عنجد موجودة؟ آه وعفكرة من تاني شهر بالحرب واحنا بناكل باقتصاد وحرص وبنخزن كل شي نقدر نلاقيه طيب كتير بنسمع عن مساعدات وتكيات وطرود غذائية، حقيقيين؟ للأسف ٨٠٪ عالاقل منهم شغل إعلام وأسلوب شحدة وبنشوفش اشي بينما آخرين بطلوا يقدروا يعدوا الفلوس الي جمعوها

أصعب فترة كانت لما انتهى الطحين تماما ووصل سعر الكيس لو لقيته بألف دولار وما كان حل وبديل غير صنع الطحين من البدائل، احنا كنا محظوظين أنه قدرنا نجيب قمح ونطحنه قبل ما ينتهي وغيرنا يضطر يطحن أعلاف الحمام والأرانب وغيرها بس عفكرة حتى القمح الي أكلناه كان مفروض تأكله مواشي ماتت

والفترة هاي أصعب لكتير ناس لأنه الطحين صار كتير لدرجة أنه مسوس وخربان في كل البيوت والخبز موجود لكن شو ياكل الواحد عالخبز؟ لا خضار ولا فواكه ولا لحوم ولا بقوليات ولا حتى معلبات فيها اشي مفيد وصحي كل اشي بناكله هو مجرد شيء يشبع البطن ويسكت جوعه ساعات لكن ما فيه أي قيمة غذائية

طيب السوق شو فيه؟ بهارات واغراض بيت مسروقة للبيع وملابس بالة أو مسروقة وبعض بسطات معلبات هي نفسها الي بتستلمها العائلات في مساعدات الوكالة:فاصوليا بازيلا حمص فول حلاوة وشوية بسطات خضار بيتية قليلة ما بتنشرى لسببين: سعر لا يستوعبه العقل وجودة ومنظر لا تشتهيها الأنفس

والتكيات الي منتشرة صورها عالنت؟ هي انعملت عشان تصوير النت للغلابى بيتمنوا يوصلهم الدور فيها، وأسلوب جديد للذل في أغلب الأحيان (أكيد ربنا يبارك في قلائل بيعملوها بقلب ورب) باختصار، أكلها سيء جدا ومصنوع بأعلى درجات قلة الاهتمام ومش مكلفة ابدأ لتقدم أي طعم لذيذ أو فائدة للأطفال

طيب شو بتاكلوا عادة؟ والله هالسؤال صعب لأنه أغلب الاكلات هي مش أطباق واضحة ومعروفة لنذكرها إنما اختراعات وتخبيصات صنعناها حسب الموجود وأوهمنا حالنا إنها أكل زاكي وتجربة جديدة ويلا الحمد لله لقينا شي نأكله وأحسن من غيرنا بكتير

أنا شخصيا كتير فخورة إني اخترعت طبخات وأهلي عجبتهم أو يمكن جاملوني عشان محاولاتي ما توقف لكن المهم حاولت ألاقي بدائل واغير من روتين الأكل لأنه الخيارات محدودة والواحد بيزهق ياكل يوم طبيخ بازيلا وتاني يوم فاصوليا وتالت يوم عدس أو رز ويلا نعيد نفس الشي

اشتريت معلبات زيتون مشرح وطبخت طبيخ زيتون، وعملت كمان طبيخ مشروم، واخترعت زبدية جمبري بدون جمبري ولا بندورة، وعملت فطاير وشاورما ومسخن وفتة وصفيحة وتاكو وتشيكن بيتزا والف اختراع من علبة لانشون زنخة وعملت طبيخ حمص و حترك باقي الاختراعات لنفسي عشان ما أصدمكو

طيب هو عنجد الناس بتجوع؟ طول عمرنا نقول محدش بموت من الجوع! اه والله الواحد بجوع وبشتاق لكتير أصناف لدرجة بينسى طعمها وبعدين يوم ما يصحله ياكل وجبة مشبعة بيحس بالذنب لأنه غيره ما لقاها وبيتمناها وآه فيه ناس بتموت من الجوع لأنه لا ضل فلوس ولا حد ساعدهم وهم متعففين

{ وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ ۚ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ }.

أنا لا أشتكي من القصف لكن أشتكي من تكاثر الطعنات

الله يرحمك يا رامي الريفي حسبنا الله ونعم الوكيل

الشهيد حبيب الله أحمد أخوية شهيد

هالووو جايز انا لسة عايشة 🙂

واحنا كمان لانه ملقت مضلش صمود اكتر من هيك

الخنقة الي حاسة فيها حتموتني حرفياً