مافيش حاجة حنينة و طيبة في الدنيا قد المخبوزات، أكتر حاجة بتطبطب على قلبي لما باكلها.

حاجات كتير كانت هتبقى مُختلفة لو كُل إنسان لقى حد يطبطب عليه و يطمنه بعد موقف كبير حسسه بالتهديد و الخوف، الطمأنينة في الوقت دة بتبقى نُقطة مهمة جدًا في نوع الحياة اللي هيعيشها الإنسان بعد الموقف دة.

It's okay إنك مش أفضل نُسخة من نفسك النهاردة، ما تنساش إن فيه بُكرة و طالما فيه بكرة ف فيه فرصة ف ما تقساش على نفسك، لازم تتقبل كُل نسخة من نفسك مهما كُنت معترض عليهم بس ماتخليش إعتراضك عليهم يخليك تنبذهم و ترفضهم عشان دة مش هيساعدك تكون أحسن زي ما إنت متخيل.

مش هتبقى إنسان آمن لحد ما تتعلم إنك ما تأذيش اللي حواليك سواء الأذى دة كبير أو صغير لإنهم مُختلفين عنك.

قمعك للجوانب المُظلمة فيك و إنعدام إعترافك بيها مش هيخليك شخص أحسن، بالعكس! الجوانب دي هتتحكم ف حياتك بشكل لاواعي منك لإنك ما اعترفتش بوجودها و اتحكمت فيها بشكل واعي.