كاسٍ مليته بالوفاء لا تكبّه خله يبلل بالوصل يابس الريق صبّه بقلبي ثم ملّه وصبّه وان كان ودك غرق القلب تغريق

غيرك نشدني وانت نشاد ياسيف انا بخير ولا عليّه خلافي اليا لفى فراق شمل المواليف كم صاد قدامي وكم من خلافي حنا طراقي والطراقي مناكيف مير البلا كان المزاهب خفافي دنياك هذي ما عليها تحاسيف ما عمرها جت خاتمتها عوافي

شيٍ بـ قلبي واهجه مستمري لولا أزرق الدخان يطفي لهيبه سلط على الدخان لو هو مضري له حزةٍ عند إحتكام المصيبه

ارخيت سمعك للأوادم وغشوك وغديت بين المصلحه والحماقه لا موني وجيه الرفاقه ولا موك وفكيت للأعذار عشرين باقه ان كان خلان الرخاء عني اغنوك مالي ورى طرد المقفين فاقه اقدر الرفقه لجل سمعة ابوك واسم نشيله كلنا فـ البطاقه

اخترت من روحي لروحي نصايح ثلاث يرضن النفوس الضياقي جمـع الحطب ومعلقات الذبايح وحذف النشاما للغتر والطواقي خلوني اقضّي باقي العمر سـايح مدام للعمر المطرف بواقي امشي تحت ظل المزون الروايح وابسط فراشي في مبارك نياقي

يا روح روحي وجرح القلب وعلاجه الطف بروحٍ عليك الهم ساهجها قلبٍ يناجيك بسلوم الهوى ناجه يشكي لك الحال داخلها وخارجها اما التفت له وتم الوصل بمواجه ولا بلا عشرةٍ هذي نتايجها وش ينفعك من حنين القلب وخلاجه وجروحٍ اسبابها انت ولا تعالجها

تبختري بين الضلوع المحاديب وتمرجحي ما بينها وأسكنيني وأروي ضماها من قراح المشاريب وعلى معاليق الغلا مرجحيني ذوّبتي ادقاق المعاليق تذويب ومنها قدرتي يالغلا تملكيني أنتي ملكتيني على السلم والطيب وأنا ملكتك وردةٍ في يديني

مخلوق ما شفته على كثر ماشفت ورا الستار من الجمال متخفّي يصد عن هرجي وهو يفهم الكفت يبيني اصفق راح كفي ب كفي

انا هواي اللي مع العقل مملوح عقله رزين ولا يجي فيه زله هذاك انا لعيونه السود مطروح ان عف ولا ما فعل فدوةٍ له

جيتك مسلم مسالم لا تحداني اقول لك كلمه ماهي على بالك اقول الاول تراه انت وانا الثاني في سيرة الحب اوقع لك على ذلك ياصادق الود ليه اعلنت هجراني ان كان من جد فال الله ولا فالك

فكرت خمس ايام واربع ليالي وطلعت من تفكيري مشيّب الراس الناس لا احتاجوك حطوك غالي وان كان ما احتاجوك حطوك هلّاس

اغربو بي يم دارٍ عساها ما تعود واعنا قلبي من هموم قلبي واعناه ياجماعه غربة الدار سلالة كبود عرضوني نجد لين اتشبع من هواه

ياعشيري عقب ضغطك على القلب الهشاش وشفتني ما عاد لي في هوى غيرك نوي ما تهيا ساعةٍ يحتويها الانتعاش في مخاوى واحدٍ ما يبى غيرك خوي الحفاوه منك ما ناشني منها نواش غير سهم الحاظك اللي على القلب يهوي من سهوم الحاظك اللي مثل ضرب الكلاش خف من الله لا تجرّا على ذبح " بدوي "