( حنا جايين هنا نضحك ونسولف وننبسط )

ثاني أكثر عبارة مكررة ومستهلكة في المساحات
مستخدمة في التمرير والتبرير والتنظير

ترا نقدر نضحك ونسولف وننبسط بدون نقولها

إذا سمعتوني أقولها
نزلوني واحظروني ولا عاد تعطوني مايك

#ادراك

حزنك ظلام وضحكتك تصنع النور
وأنا فقير أطلب زكاه إبتسامه

ولثامك اللي باني لمبسمك سور
يقدر يعالج لي إكتئاب العمامه

#بوح
#فيصل

3 شروط
لو نطبقها كلنا على تغريداتنا
نقعد باليومين والثلاثة ويمكن أكثر وحنا ماكتبنا شي

عرفتوها ؟!

#ادراك

جمهور تويتر
اللي متفاعلين ونشيطين في التايملاين
اللي يكتبون حوالي 3 إلى 4 تغريدات أو ردود في اليوم

أنتم ضمن الـ 10% مستخدم النشيطين
اللي مسؤلين عن 92% من محتوى تويتر
اللي يوصل إلى 500 مليون تغريدة يومياً

سوالفنا/خواطرنا/هبدنا/صدقنا/تسذبنا
واصلة للعالمية

#ادراك

ودي برساله من طرفكم إليها
وردوا عليها بكيفكم جِـد ومزوح

بيتين لو ينضاف إسمه عليها
وش تتوقعون يصير في الشعر والبوح

#بوح
#فيصل

الله يرحمه ويغفرله ويسكنه فسيح جنّاته
الله يعظّم أجر أهله ويحسن عزاهم

#بدر_بن_عبدالمحسن

عندي ثقة كبيرة
في الدراسات اللي من تأليفي ومن جيبي
أكثر من ثقتي في دراسات المراكز الغربية

آخر دراساتي
(الناس اللي عادي يخلصون مشاوريهم ويجيبون أغراض في القوايل)

- ناجحين في الحب
- عندهم قوة تحمل وإيجابية ومرونة
- أقل عقد نفسية
- يستاهلون هداياكم وعزايمكم
- يصلحون للسفر

#ادراك

تغريدات الليل يمحيها تايملاين الصباح

#ادراك

ترند رابوستين
أفضل وأقوى من الترند الهندي

لكن مالقى إهتمام وإنتشار كافي
وهذا أمر مؤسف جداً

#ادراك

مصنّفة تصنيف فاخر وراقي
الغيم سارق من حلا طيوفها شي

قالت صباح الخير والشمس باقي
باقي على مايِـنبلج نورها شوي

القول في حال الزمان إستباقي
وكأنها تطوي قوانين الزمن طي

وفي قولها معنى عميق إنبثاقي
إن الظلام إذا بغت تقلبه ضي

#بوح
#فيصل

( مونتاج بسيط )

الزملاء والزميلات
اللي بينهم نسبة تشابه
في التفكير والإسلوب وفي الشخصية

صحيح نظرتنا تختلف عن بعض
بس هل تشوفون فيه تشابه ؟
أو فيه إختلاف كبير بين تقييمنا للتشابه ؟

وهل فيه باقي غيرهم متشابهين ؟

#ادراك

مجموعة من اليهود والنصارى

فاتحين مساحة عنوان محتوى سوالفها
( اذكروا محاسن موتاكم )

عن أعمال هتلر الخيرية والإيجابية
وعن الجانب المضيء من حياته

#مساحات

الأكل والشرب والنوم
لها تأثير كبير على الإنسان (صحة وعافية)

و (الكلام)
اللي يسمعه أو يقوله أو يقراه أو يكتبه الإنسان
سالفة-تغريدة-بيت-قصة-خاطرة-رأي-تحليل

باختصار
الكتابة والنقاش
واقعياً أو إفتراضياً لها تأثير على الإنسان

وهذا سر
كيف مجرد (كلام) يجيب لك راحة أو عدم راحة

#ادراك

الشمس تفرح ليا شافتك من بدري
وش حاجة الشمس من تصبيحة أضدادك

كبلتني فيك من دون أفطن وأدري
قلبي وروحي رهينة فتنة أصفادك

لا تسأل تقول ناسي ماعرف قدري
مرسوم طيفك بعقلي وكامل أبعادك

أنا كيف أبنساك والتقويم في صدري
وكل الصباحات عندي يوم ميلادك

#بوح
#فيصل
#صباح_الخير

6 منصات
تويتر-قوقل-يوتيوب-سناب-تيك توك-إنستغرام

تعرف عنك أكثر من ما تعرف أنت عن نفسك
وأكثر من اللي يعرفونه الناس اللي حولك

خوارزميات مترابطة
تحفظ وتحلل كل شي تشوفه وتبحث عنه

تعرف نواياك-هواياتك-اهتماماتك-رغباتك
تعرف مزاجك-طلباتك-ضعفك-قوتك

#ادراك

عشان أعالج كل مابي مآسي
وأعيش عمري اللي بقى طيّب وزين

وهذا ترا كامل طموحي الأساسي
وروحي على هذا مع القلب راضين

يحتاج لك يافاتنه جَـلدْ قاسي
قاسي على الخدين والخشم والعين

وإن كان لك نيّه برد إنعكاسي
رِدي على ماجاك بالصاع صاعين

#بوح
#فيصل

فيه حلم تافه وأمنية منتشرة هالأيام
نسمعها ونقراها كثير نشروها التافهين المشاهير
( حلمي وأمنيتي سيارة G Class ) !!

والناس طاروا فيها وخاصةً البنات
هالنوع من الاهتمامات والكلام عنها
دليل على انتشار جيل مادي غبي تافه سطحي

#ادراك

عندي قواعد ثابته خلفها أسباب
قلبي بسبتها تعذّب وعانا

منها القمر عن السما يوم ماغاب
هو كيف يغيب وطيفها محتوانا

#بوح
#فيصل

بعض المرّات
في التايم والمساحات

( إنّي لأَجِـدُ عَـبَـقْ طَيفها لولا تُفنّدون )

#بوح
#فيصل

في المساحات والتايملاين
كلنا أو الغالبية
لنا محتوى وسوالف عن (مواضيع وأفكار) متنوعة

محتوى نحبه ومحتوى نكرهه
محتوى نفهم فيه ومحتوى مانفهم فيه

وهنا فيه سؤال
وش هو المحتوى اللي نقدر نقول عنه
إنه ( محتوى من لا محتوى له ) ؟

#ادراك