الواحد بقي بيواسي نفسه بطريقة مثيرة للشفقة بجد والله اللي هو معلش احنا نستحمل مع بعض شوية واوعدك بعد كل ده ما يخلص هعوضك وابسطك

أحيانا الواحد بيسأل نفسه هو عمل ايه عشان يحصل فيه كل دا!!

عارف لما تصحى كل يوم على مصيبة تسبب فيها أحدهم بس انت اللي بتشيل الليلة!!

انا عايش على أمل إن ربنا هيراضيني ويجبر بخاطري

فِكرة إنك تكلمني وتحاول تعتذرلي عن حاجة إنتَ عملتها وضايقتني، فدي كبيرة أوي عندي، ومُستحيل أتعامل معاك على إنّك مُخطأ، أنا الموضوع بالنسبة ليا اتنسى وانتهى في اللحظة اللي حسيت فيها منك إن زعلي فارق معاك وإنك مقدّرني بشكل كافي .. أنا شخصية بسيطه جدًا ويكفيني إن اللي قُدامي يطمني.

انا الكلام اللي بقوله عمومًا مايجيش 2% من الكلام والأفكار اللي بتدور في دماغي بس I can't put them into words

نفسي ابقى من الناس اللي بتعرف تبسط نفسها.

مستني اليوم اللي هعيش فيه من غير قلق وتوتر.

مؤخراً اكتشفت إن أكبر مشاكلي في الحياه إني مدمن تفاصيل وبفكر كتير ، بسأل نفسي في كل موقف الف سؤال ، برهق عقلي بالتفكير في سيناريوهات محدش غيري بيفكر فيها اصلا ، بفضل اربط الأحداث ببعضها علشان في الآخر اوصل لإستنتاج يقدر يخدم اسلوب تفكيري و احساسي واللي بنسبة 90% بيطلع صح للأسف

أنا هفضل أهندل كل حاجة لحد امتى؟

عاوز اعيش نفس احساس اللي خرج من الحرب منتصر والجيش قرر يجيبله فيلا وعربية تقديرا لمجهوداته في الحرب وقالوله شكرا انك تعبت معانا كل الفترة اللي فاتت دلوقتي مش هتخوض اي حروب تاني وتقدر تعيش سعيد للأبد.

انا بفكر ثانيتين قبل ماعمل مشكلة مع حد وبكتشف اني هضيع من وقتي وراحة بالي وان اي شخص يعتبر مش مهم بالنسبالي فبقرر أتجاهله واعتبره مش موجود للأبد وبكدا مفيش مشكلة ومفيش الشخص نفسه تاني.

انا كل اللي يعرفني بيحترمني بنسبة كبيرة جدا، وأكاد أجزم اني ماليش أعداء لأن غير ان محدش يعرف عني حاجة مهما كان فاكر نفسه قريب ، انا كمان بريح دماغي من الناس كلها يعني دايماً بعاملهم بدماغهم فمبيحصلش مشاكل لان مفيش حاجة شخصية بيني وبين اي حد.
أنا وجودي خفيف زي رحيلي.

الموضوع اكبر من كونه تقلب مزاجي و فقدان شَغف والله ، انا عايز اختفي من الدنيا كلها.

التعلق ده اكبر جريمة بيعملها الانسان ف نفسه، يفضل يغرق ويتعلق لحد ما يبقي هش و out of control مجرد غياب اللي متعلق بيه قادر يهده ف لحظة.

موضوع إنك تتعامل إنك متجاهل حاجة و هي مبتروحش من بالك ده صعب جدا.

مفيش مشهد مرعب اكتر من انك تشوف الcomfort zone بتاعتك بتتحول تدريجياً لمكان مش مريح بالمرة

اكتر حاجة بكرها فيا اني مبعرفش احرج حد بالتالي مبقولش لحد لأ ولو عملت كدا بحس بتأنيب ضمير رغم ان دا حقي ومغلطش في اي حاجة.

عارف لما تكون مشكلتك إنك مش مرتاح تعمل اي حاجه اللي هو مش مرتاح تتكلم مع حد ولا تسكت مش مرتاح تكون وسط ناس ولا تكون لوحدك مش مرتاح مع حد ولا تبدأ في حاجه جديده، حتى الحاجات اللي بتحبها مبقتش بترتاح انك تعملها واللي هو حرفياً مفيش اي رُكن موجود فحياتك بيحسسك إنك مرتاح.

عاوز حد يجي يقولي بس انت كفاية عليك تعبك الفترة اللي فاتت سيبني انا اتصرف.